السلام عليكم .. اخباركم ؟ ان شاء الله بخير .
و اخيرا كتبت هذا البوست اللي صار له اكثر من ٣ اشهر خلصت الاجازه و ما نزلته ان شاء الله تستفيدون منه .
انا صرت اكسبرت ترتيب شنط السفر من عدم الاستقرار .. قريب ادخل موسوعه غنيست ههههههههه .
طبعا ترتيب الشنطه يختلف من سفره لسفره و اذا انتي بتنزلين ببيتكم او ببيت احد او اذا سفره سياحه .
اول شي بتكلم عنه الشنط البعض عارف اني لما رحت للكويت انشقت شنطتي نصين و ضاع اشياء كثيره و توسخت ملابسي حسبي الله و نعم الوكيل و من القهر رحت اشتريت طقم شنط جديده . هذي الشنط مصنوعه من الفايبر ما تنكسر ان شاء الله و لها اربع كفرات دعايتها ب MBC وين كنت عنها قبل اخذت ٣ شنط . فيه ورديه اصغر من التركواز و اكبر من البنفسجي بس ما اخذتها معي .
سفرتنا هذي بنعيد عند اهلنا يعني كنت احتاج اغلب مكياجي مدتها اقل من ٢٠ يوم . و ان شاء الله الاثنين الجاي بنسافر برا الاغراض بتفرق طبعا .
الملابس كانت اغلبها مريحه كشخه ههههه الشرح توحفه بشرح مره ثانيه يعني اغلب وقتنا مع خالاتي و خوالي و زوجاتهم يعني شي مرتب . ملابس الطلعه قليل لان مكتفين باهلنا . اغلب الاوقات ابرم الملابس رول عشان تكفي الشنطه بس اصلا ما اخذت ملابس كثير و الشي الثاني ما ابيها تتعفط جينا قبل العيد بيوم ما يمدينا نكوي الملابس و حوسه العيد .
الشنطه فيها قسمين و تتسكر على بعض . القسم الثاني فيه جزم الالوان الاساسيه كلهم بالدست باق . و ٣ شنط بعد بالدست باق . الشنطه اللي لونها احمر فيها ملابس داخليه اخذت كثير احب احطها بشنطه لان ما احب احد يشوفها . اخذ بعد كيس للاوندري اشتريته من سنتر بوينت طبعا اذا كنت راجعه من الرياض لاهلي كل الشنطه لاوندري ههههههههههههه .
ارتب كل اغراضي الثانيه بشنط صغيره هذا الصورة ناقص فيها شنط نسيت اصورهم بالصوره الجماعيه .
اول شي الشنطه الحمرا اللي باليسار نسيت اصورها فيها حشوات الشعر الدونات و بندانات و ربطات شعر .
هذا اغلب مكياجي . الشنطه من فكتوريا سيكرت احلى و اريح شنطه جربتها كبيره من داخل .
من داخل فيها ٣ اجزاء ٢ كبار و واحد صغير و فيها هوك اقدر اعلقها ورا الباب .
المكياج كله احطه باكياس الساندوتش عشان اذا انكب ما يخرب لي اغراضي .
بهذا الكيس فيه كل الفاونديشون و الكونسيلر اللي احتاجه.
هنا فيه البودرات و البلاشرز و اشياء ثانيه .. البودرات فوق بعض . اذا بتسافرين بطياره حطي قطن فوق البودره و سكري العلبه يحميها انها تتكسر.
هنا اخذت الباليتات ٥ بدون النيكد لان الكيس ما يكفي .
هنا فيه ٣ انواع رموش و كريمات طبيه للبشره و عدساتي .
هذي علبه سيدي فيها بلاشرز و شادوز و العلبه نفسها اغسل فيها الفرش .
اذا سافرت احب اخذ معي عينات فاونديشون من ماك و اجربهم .
شكل الشنطه و هي معبيه .
اقلام الكحل و المحددات و الماسكرات احطهم بمقلمه .
هذي الشنطه اخليها للمكياج اليومي و الاشياء الضروريه ما تكون بالشنطه الكبيره . اخذتها من فكتوريا سيكرت بعد .
احط فيها فرشاة الاسنان و المعجون و مزيل العرق و قطن و مكياجي اليومي .
احط فيها ٣ فرش بس ، الشنطه من بنك كانت لكفر جوال . لان لو بعدل على مكياجي بس هذي الفرش اللي احتاج .
البيوتي بلندر حاطتها بعلبه صغيره . بس هذا اللي بالشنطه الصغيره .
باقي الفرش بهذي العلبه من سقما مرره احبها للسفر .
هذي الشنطه اللي فيها العنايه بالبشره و الاشياء اللي احتاجها بالحمام قبل النوم و اذا قمت .
شكل الشنطه من داخل مقسمه احط داخلها بعد منشفه الوجه الصغيره و اسفنجه للوجه من بودي شوب و مناديل ديتول .
الحلو فيها ان لها هوك اعلقه ورا الباب .
اشتريت كثييييير من هذي العلب من ستي ماكس مررره مفيده و فيه لها انواع .
من اليمين: تونر - غسول فم - مقشر للوجه - مزيل مكياج العيون - كريم مزيل مكياج .
من اليمين : واقي شمس - كريم مرطب للوجه - كريم مرطب لليدين و الاظافر - كريم للحبوب - غسول للوجه - لابيلو - علبه تعبين فيها عطر كتبت عنها بالانستقرام - قطرات مرطبه للعيون .
الشنطه الثانيه فيها عينات سكين كير اجربها .
كيووت مره صغير .
هذي الشنطه الوسخه فيها بعض الحجم الكبير من بعض المنتجات لان فترة عيد ما ينفع علب صغيره .
اغلبها مزيلات مكياج ، فازلين و فيقس من الاساسيات هههههه مزيل عرق و مزيل مناكير من برجوا . كلها ببلاستيك ساندوتش .
هذي الشنطه لاغراض الشاور ، الشنطه من زهور الريف اشترتها لي جدتي الله يطول بعمرها .
الشنطه من داخل مقسمه و تتعلق ورا الباب بلاستك من داخل .
من اليمين لوشن و شاور جل بنفس الريحه - كونديشونر - لوشن ثاني - بدري سبري - عطر خفيف - زبده للجسم .
فوق من اليمين: محلول عدسات - نسيت اسمه بس اللي نشقر فيه الحواجب - سبري مثبت - موس مثبت و حامي من الحراره - بديل الزيت .
تحت يمين : خيط اسنان - بودره تشقير الحواجب - لصقات كرست - لصقه الرؤوس السوداء .
من اليمين : ماسك للشعر - ليفن كونديشونر للشعر - سيروم - زيت لوريال بعلبه السيروم فاضيه - ليفه صغيره .
من اليمين : شامبو صغير - صابون سائل لليد لان اكره الصابون القطع - معجونين اسنان صغار - كريم نيفيا يكون بالشنطه اللي فيها السكين كير و جوالي بس عشان تشوفون الحجم هههههه .
من اليمين : اسيتون - غسول كير فري - ماسك للوجه .
بالجيبه الصغيره اللي بالنص مبرد اظافر - موس - كلب شعر . بس هذا اللي احتاجه للشاور و بهذي الشنطه .
العلبه الصغيره فيها البنس و ربطات الشعر و العلبه الكبيره مقسمه للاكسسوارات .
فير - سيراميك - استشوار - فرشة شعر - مجفف شعر بس ما كفت له الشنطه .
الشنطه الصغيره بعد مقسمه جزئين فيها كل الشنط الصغيره . هذي الشنطه فيها اغلى ما املك .
طبعا شنط الشاور و السكين كير تكون جاهزه على طول معبيه اختصر على نفسي وقت كثيييير
لهم درج بغرفه الملابس اذا ما شفتيها كتبت بوست كامل عن الغرفه .
غير شنطه يدي شنطه الاب توب و شنطه ثانيه الالكترونيات فيه كاميرات و اجهزتي و الاسلاك هذي ثاني اغلى شنطه هههههه المكياج اهم نسيت اصورهم اذا مهم عندك تشوفينها اكتبي لي و ان شاء الله انزله .
و اكثر شي بالدنيا ابوي يكرهه كيس مخداتي لازم اتعالج الناس الطبيعيه ما تقدر تنام الا بمخده وحده تكون متعلقه فيها انا ٥ مخدات كانوا ٦ بس تنازلت عن وحده بالهواش ما ادري ليش الناس تحسبني اتدلع و انه عاجبني انقل ٥ مخدات معي بالمطار صدق صدق الناس كلهم بالمطار يضحكون علي و اخر شي كل اخواني يترجوني اعطيهم مخده بالسياره . كثير انحرم انام عند احد لاني ما جبت مخداتي .. الزبده فيه وحده تعاني مثلي كيف تنقلين مخداتك انا جربت كل انواع الاكياس ما لقيت احسن من اكياس سنتر بوينت الكبيره مره بس اذا مرت تحت سير التفتيش تتكبكب و تتوسخ ما لقيت الى الحين طريقه انقل فيها مخداتي . صار لي على هذا الحال ١٠ سنوات .
و بس هذا كل شي اخذه معي بالسفر ان شاء الله يعجبكم البوست و استفدتوا منه اذا عندك طرق معينه بترتيب اغراضك اكتبي لنا نستفيد .
مممرره حبيت البوست
ردحذفقويه مرة حكايه الخمس مخدات
ردحذفشكرا
ردحذفشكرا
ردحذف